اجلعنا صفحة البداية l اضفنا للمفضلة ارسل لنا خبر وصورة

 

 
 

كاشف العارف راح يضرب مارزل بكندرة.. رجع ضاربته الشمس وراح ما يروح فيها

كاشف العارف راح يضرب مارزل بكندرة.. رجع ضاربته الشمس وراح ما يروح فيها


2012/07/16

اضغط هنا وساهم في نشر المقال على الفيس بوك



المواطن كاشف العارف زلمه وطني حتى النخاع،ولما يسمع بسيرة المستوطنين واليمين المتطرف بتضوي كل الفيوزات عنده وبفور دمه،عشان هيك قرر اليوم المشاركة في مسيرة التصدي لزيارة باروخ مارزل وزمرته من المستوطين لمدينة الناصرة ويضربه بستين كندرة بعيد عن السامعين!!.
كاشف العارف طلع من دغشة من قريته ووقف ع المحطة عشان يلحق يزقط توصيله "ترمب" للناصرة لأنه ما معه يدفع أجرة باص أو تاكسي، مثل ما إنتو عارفين الوضع المادي كبه وقاعد زي غيره من هالشعب المعثر ع حديدة.
 المهم أخونا زقطله ابن حلال وطلع معاه،على مشارف الناصرة زلمتنا ما شاف غير سيارات البوليس والبلد كانت سالكه ع الآخر والمحلات مسكرة كلها،وراحت عن باله انه يوم الأحد البلد بتكون معطلة،وهز براسه وقال "هو لو قيادتنا أعلنت الإضراب الاحتجاجي اليوم بتزبط معها" وكل واحد منهن بطلع يطنطن بنجاح الإضراب،ما علينا وشو بدكو بطولة السيرة،نزل كاشف العارف بمنطقة العين،والظاهر انه وصل بكير يعني حوالي الساعة عشرة ونص،وبلش يسأل وين الاحتجاج راح يكون وبعد ما نشف ريقه وهو يسأل أجا واحد يكحلها قام عماها،لما جاوبه أي مظاهرة انت بدك عمي؟ جاوبه زلمتنا احتجاج التصدي لمارزل يا رجل شو أي مظاهرة!! رد عليه الشخص :" والله فاهم عليك بس انا كيف شفت مبارح كان منشور واليوم كان منشور،واللي فهمته على هوا الحركة انه ع العين في مظاهرة للحزب الشيوعي والجبهة وعند مفترق الكراجات في مظاهرة ثانية والله وأعلم لجماعة التجمع".
أخونا كاشف العارف بعد ما سمع هالسمعه بلش يضرب أخماس بأسداس وارتفع ضغط الدم عنده وطلع  علبة لف السجاير العربي،وبلش يلف سيجارة يروق فيها أعصابه قبل ما تفقع معه مرارته وقال "كله خلقة هالمارزل مش عارفين تتفقوا ع محل،وتختصروا كل هالبهدلة والشحشطة".
ومثل ما انتو عارفين كاشف العارف زلمه مش حزبي ولا يحزنون ما بتفرق معه وين يتظاهر المهم يعمل واجبه الوطني،وهو عم يجعط بسيجارة العربي بلشت تيجي الناس ع ساحة العين حاملين معهن شعارات، وما كذب خبر،حمل شعار ووقف معهن وشارك بالإحتجاج،وبعد ما خلص الإحتجاج بالعين، بلش يستفسر وين مارزل وجماعته راح يوصلوا،وفهم انه ممكن يكون الوضع بمفترق الكراجات،وراح سالخها مشي بعز الحم من العين للكراجات وعرقه بمصي من وجهه ومش شايف متر قدامه.
لما وصل لمفترق الكراجات بطلوع الروح لاقى انه في كمان مظاهرة وناس حاملين شعارات ورافعين كنادر،وقرر يشلح كندرته ويصف معهن ويرفعها ويستنى لحتى يوصل الباص تبع مارزل..
وبعد انتظار طويل والكاميرات مبلشه طقع صور والتلفزيونات نازله تصوير،والشمس بتقدح براسه وهو واقف على المفترق،تفاجئ انه البوليس بلش يضب العدة ويفتح الشوارع اللي كان مسكرها ولما سأل شو السيرة يا جماعة.. قالوله خلصت المظاهرة،طيب مارزل ما أجا وما شفناه؟ جاوبه واحد يطعمك الحجة والناس راجعه عمل مظاهرة مع جماعته بالمنطقة الصناعية لا مين شاف ولا مين دري.
كاشف العارف بعد كل هالنهار المشقلب من أوله بلش يحس بدوخة ووقع ع الأرض وأغمي عليه وما فاق الا وهو بالمستشفى وأول ما سأل عن كندرته!!،وكانوا معلقينله كيس الفيتامين لانه صار عنده نقص حاد بالسوائل وعوارض لضربة شمس.
ربنا ستر زلمتنا كاشف العارف ولولا شوي كان صار شهيد "إحتجاج مارزل" وكان كلنا طلعنا بمظاهرة بجنازته واحنا منهتف "يا شهيد ارتاح ارتاح واحنا منكمل كفاح"،انه يرتاح من وضع احزابنا وقيادتنا هذا اشي أكيد، أما يركن عليكو تكملوا كفاح  بس على جثته بصير هذا الإشي!!

اضف تعليق

l

اطبع المقال

عدد التعليقات : (2)

1-

الله اكبر على هيك قصه
وان شاء الله بالنجاح لموقع كاشف
لانه مثل هذه القصص حرام ما يقرأها كل مواطن (صالح)


مراد 2012/07/22 مندا  

2-

شايف يا كاشف هيك تقريبا تنتهي القصة دايما وقباداتنا ما بتحسب حساب لآراء جماهيرنا ،أصلا لو كان بهمهم الجماهير كان ما لزقت مؤخراتهم بالكرسي عشرات السنين
بعين اللله يا كاشف


شايف 2012/08/03  
اضافة تعليق

اضف تعليق

الاسم :*
البلد / الدولة :
التعليق :*


جميع الحقوق محفوظة لدى موقع كاشف كوم 2011-2012
(الآراء المنشورة في الموقع تعبر عن رأي كاتبيها فقط)

من نحن | ارسل لنا خبر | إتصل بنا