اجلعنا صفحة البداية l اضفنا للمفضلة ارسل لنا خبر وصورة

 

 
 

كاشف العارف يرصد خفايا مسيرة هبة القدس والأقصى في سخنين!!

كاشف العارف يرصد خفايا مسيرة هبة القدس والأقصى في سخنين!!


2012/10/02

اضغط هنا وساهم في نشر المقال على الفيس بوك





كعادته زميلنا كاشف العارف يبذل جهده للمشاركة في كافة المناسبات الوطنية،ومن كثر ما شاف صارت مرارته  مطفية،بس بالآخر لازم يحكي ويخرفكوا القصة وما فيها.
طبعاً معظم المواضيع اللي برصدها كاشف العارف بتكون وليدة الصدفة يعني ما بحس ولا الشغلة بالوجه،وخلال مشاركته في مسيرة إحياء الذكرى 12 لهبة القدس والأقصى في سخنين تابع بعض الشغلات واللي بتفدر دم الواحد.
ليش ما أعلنتوا الإضراب:
مجموعة شبابية رفعت لافتات مكتوب عليها شعارات احتجاجية عشان لجنة المتابعة ما أعلنت الإضراب بهذا اليوم،ومن الشعارات اللي كانت مرفوعة" الشعب يريد الإضراب، إنتوا مع مين؟"، "ليش ما أعلنتوا الإضراب ونكبة جديدة ع الباب"،"بدنا لجنة منتخبة مش منتكبة"،طبعاً هاي المجموعة (شاب وصبيتين) أصروا بل ألحوا إنه قيادتنا اللي كانت بالصف الأول تشوف هاي اللافتات ورفعوها قدامهن،يعني كانوا ماشيين (ريفرس)،هذا الوضع ما أعجب أكم واحد من اللجنة الشعبية المحلية في سخنين وحاولوا منع هاي اللافتات بالقوة بس الوضع ما زبط،والشباب واصلوا رفع الشعارات بس كانت  هاي المرة بالإتجاه المعاكس لقدام.

وطبعاً خلال المسيرة كان في مجموعات تهتف هتافات إحتجاجاً على عدم إعلان الإضراب ومن اللي سمعتها "ليش ما أعلنتوا الإضراب ليش".
بس عنجد هذا سؤال مطروح (ما حدا ضاربه حجر على صباحه) ليش ما كان في إضراب، الجماهير مرهقة مثلاً من كثر الإضرابات مثل ما بتقول قيادة المتابعة؟!! طيب يا عمي منسميه عطله رسمية في مناسبة وطنية بلاش يكون إسمه إضراب،وبعدين كانت فرصة ينعمل اضراب خاصة إنه أغلب العمال معطلين عن شغلهن عشان عيد "العرش"عند ولاد عمنا،والمدارس من طبيعتها الطلاب ما بتروح بس تسمع عن الإضراب وظل أكم دكانة تسكر بكل بلد، يا عمي بلاش دكاكين ويطلعوا التجار يقولوا خربتوا بيتنا!!!،خليها طلاب مدارس ويخلف عليكوا على الأقل طالب المدرسة لما ما يواظب على مدرسته  وبسأل ليش في إضراب راح يعرف، وإذا في حدا مركن عنجد انه بالمدارس تعمل فعالية تثقيفية للطلاب  عن المناسبات الوطنية معناه كفك ع الضيعة، الا من رحم ربي،!!!

عزيزي المتظاهر لن نراك هذه المرة في سخنين:


طبعاً عزيزي المتظاهر الكريم (سواء ذكر أو أنثى) اذا كنت من نواحي الطيبة وما حولها أو المثلث أكيد ما شفناك بسخنين كيف كان مخطط حسب برنامج الحافلات،وربما نراك  في الذكرى القادمة بعرابة أو أي مكان آخر مش لأنه الحافلة يعني الباص قطعك يعني قدحلك وانت ناطر وتستنى لاء لأنه من الأساس ما كان في باص،عشان برنامج الباصات كله طاسة وضايعة،حتى النقب ما كان معمول حسابه.
عزيزي المتظاهر ما تحط بقلبك وإمسحها بهاللحية يعني هو انت لو شفت في باصات طلعت من مدن عربية وبالقوة نصها مليان،وفي باصات ما تجاوز فيها الركاب عدد أصابع اليد الواحدة.
عزيزي المتظاهر احنا منقدر الروح الوطنية عندك ومنشوفك في مناسبات وطنية قادمة،بس حضرتك ناطر ومستني الباص يجيك ما عرفت تدبرلك ترمب وتيجي عنجد إشي بفقع.

قيادة صامدة ومقاومة للمطر:

 


نشرات الأحوال الجوية بالإذاعات بنفس اليوم من الصبح وهي تطنطن إنه تسقط أمطار متفرقة،بس شكله ما حدا كان متوقع،هي مش أمطار متفرقة بالزبط  كانت زخات قوية،ممكن كان القصد متفرقة تؤدي الى تفرق المشاركين بالمسيرة،وهذا اللي صار لما اشتد المطر وصارت عاصفة قوية وكلها غبرة انسحب بعض المتظاهرين للبحث عن أماكن تحميهم من المطر،بس قيادتنا ظلت صامدة وابتلت القمصان وحتى البناطيل وواصلوا المشوار،ولو إنه قيادتنا ما كانت مقاومة للمطر كان فرطت المسبحة كلها وتفرعطت الجماهير، على هيك وقفة شجاعة تستحقون كل الإحترام والتقدير.

رغم هيك في ناس من المشاركين صاروا يحكوا إنه هذا المطر هو غضب وحزن على الوضع اللي إحنا فيه قيادة وشعباً،وفي ناس بتحكي إنه خير وبركة الله وأعلم.

الحاجة أم الإختراع:


بهدف الإلتفاف على قرار لجنة المتابعة بعدم رفع الأعلام الفلسطينية والأعلام السوداء في مسيرة هبة القدس والأقصى كان هناك إبتكارات عديدة،وهي كتابة عبارة "لا اله الا الله محمد رسول الله" على العلم الفلسطيني وطبعاً هذا الأمر أدى الى إشعال حرب بين الناشطين على مواقع التواصل الإجتماعي" الفيسبوك" وربما تجاوزت الخطوط الحمراء وتحولت الى حرب طائفية بإمتياز على إعتبار من يرفض عبارة التوحيد أينما كانت فهو كافر وملحد وما الا ذلك من أوصاف.
والوضع ما توقف عند هذا الحد،تم توزيع قبعات "طواقي" باللون الأخضر ومكتوب عليها "لا اله الا الله"،وتحتها عبارة الحركة الإسلامية في سخنين،والمهم انه رئيس لجنة المتابعة وصلته طقية من هذا النوع وفضل انه ما يلبسها حفاظاً على اللحمة  "اللوحمة" ما يروح فكرك لبعيد،وظل حاملها بإيده، بس على فكرة ما شفت ولا علم أسود غريب..
ما وقفعت الشغلة على الطواقي كان كثير ناس لابسين بلايز عليها شعارات ورموز حزبية،حتى انه تم رفع الأعلام السورية من قبل ما يسميهم البعض" الشبيحة".
كمان بنفس المسيرة كان حوالي 3-4 مسيرة بأولها مسيرة وبنصها مسيرة وبآخرها مسيرة،وكل واحد بردد شعارات على كيفه،وطبعاً كل مسيرة يقوم عليها مجموعة تابعة لفئة حزبية او سياسية.




 

اضف تعليق

l

اطبع المقال

عدد التعليقات : (2)

1-

يقول المثل يا كاشف : " خلاف الرأي لا يفسد للود قضية " !!!
بس والله يا كاشف انو احنا تخربطنا وبطلنا نعرف شو هي القضية أو هل توجد قضية أصلا ؟ لأن المجموعات والفئات عادة تختلف على طرق حل القضية وليس على القضية نفسها . أما نحن والحمد لله في المناسبة الواحدة نختلف على تسميتها من الأساس.
والأمر من ذلك يا كاشف موضوع القيادة أو على الأصح القيادات فقبل أن نتفق على قيادة موحدة نختلف داخليا على قيادة كل فئة او مجموعة ّ!!!
والمصيبة يا كاشف انو يا سيدي في ناس بتطالب بتغيير القيادات !! شو يعني اذا القيادة صارلها عشرين ثلاثبن سنة ؟ مهو تاريخ صلاحيتها بعدو مليح !! أصلا تاريخ انتهاء الصلاحية مش مكتوب على " العلب " آسف زلة لسان قصدي القيادات والتاريخ منعبيه وينتا ما بدنا عند الحاجة .
خليها لربك يا كـــــــــــــــــــ
ـــــــــاشـــــــــ
ــــــــــــف


شايف 2012/10/02  

2-

يا كاشف في كمان شب كان رافع شعار واجا حدا مزعلو اياه, هو الشب الي ماشي ورى مع نظارات


مشارك بالمسيره 2012/10/02  
اضافة تعليق

اضف تعليق

الاسم :*
البلد / الدولة :
التعليق :*


جميع الحقوق محفوظة لدى موقع كاشف كوم 2011-2012
(الآراء المنشورة في الموقع تعبر عن رأي كاتبيها فقط)

من نحن | ارسل لنا خبر | إتصل بنا